BDI e PDSH përplasen rreth implementimit të Marrëveshjes së Ohrit. Nga partia e Thaçit sot akuzuan partinë e Ahmetit për deklaratat kontradiktore të dhëna nga zëvendëskryeministri Abdylaqim Ademi sa i përket kësaj çështje.
Ata apeluan deri tek BDI që publikisht t'u kërkoj falje shqiptarëve për manipulimet e këtilla.
"PDSH-ja uron që disa njerëz në BDI qenkan vetëdijesuar dhe pranojnë se gjatë këtyre muajve sa janë në pushtet nuk kanë arritur që të implementojnë asgjë nga Marrëveshja e Ohrit. Por, opinionit ia përkujtojmë edhe deklaratën e disa muaj më parë po të të njëjti person, ku ai mes tjerash thekson se marrëveshja e Ohrit është realizuar edhe atë me një përqindje marramendëse, pra prej 95%", tha zëdhënësi i PDSH Adriatik Imeri.
Ndaj kësaj ka reaguar kabineti i zëvendëskryeministrit Ademi duke akuzuar PDSH se gjatë qeverisjes dy vjeçare nuk ka ndërmarr asgjë për implementimin e marrëveshjes së Ohrit. "Deklaratat tona nuk janë kontradiktore, siç dëshiron dikush ta paraqesë sepse implementimi i Marrëveshjes së Ohrit vazhdon dhe ne më herët kemi deklaruar se afër 95 për qind e pjesës normativo-juridike të kësaj marrëveshje është miratuar (kushtetuta, ligjet) ndërsa vazhdon zbatimi i tyre në praktikë", thuhet në reagimin e kabinetit të Ademit.
Edhe në anketën e publikuar ditë më parë nga ana e Institutit për demokraci më shumë se 50% e qytetarëve janë shprehur se marrëveshja e Ohrit nuk është implementuar në tërësi.
Sat Jan 24, 2009 1:47 am
